Wenn du e churzi Pausa bruuchsch, öppis Feins möchtisch essa oder trinke, dine Chind bim Spiele zueluege oder eifach die tolli Ussicht gniesse bisch an eim vo üserne Kiosk genau richtig. Chum verbii, mier freuend üs uf dich!
Am Lido gnüssisch kalti und warmi Getränk, feini huusgmachti Suppe, Grillade, kliini Snacks und Älplermaggrone direkt am Heidsee und an der Langlaufloipe. Oder magsch es Raclette am offne Füür selber mache! En wunderbare Ort zum Verwiile und de Kinder bim Spiele zuazluaga.
Im Dezember und Januar gits heissi Marroni.
Während der Wintersaison isch der Kiosk Lido immer vom 9i bis am 16.30 offe. Mier freuend üs uf eu!
Am Kiosk Canols gnüssisch feini Bergflada, Kässchnitte, gueti Quarkpizzokels, huusgmachti Suppe und vieles meh. Herrlich in Valbella am See und wunderbar für en Gnusshalt während em Spaziergang oder als perfekte Pausahalt bim Langlaufa. Mier hend für eu vom 9i bis am 17i offe. Übrigens macht der Chef Hampa d’Nusstorta selber, nach em Originalrezept vo der Bündner Büürin Petronilla.
Am Kiosk am Heimberg gnüssisch iheimisch- der Kürbis für d’Suppa kunnt vor Yvonne und am Noldi us Mon, Fleisch vom Rind vom Bauer Heinrich in Filisur und Bio Lamm direkt vom Puur Jan vom Salzgeberhof grad nebeddra, di beschta Würscht bringt üs der Tona vor Metzgerei Spiess, Trockafleisch macht der Jörg Brügger in Parpan, Glace und Rahm kömend us Filisur vor Nicole Heinrich, Nussturta und all die feine Cake bachend miar no selber - was will ma meh? Ah jo und d’Gerstasuppa wird immer frisch und sälber kocht. Offe hemmer vom 9i bis 16.30.
Mit bündnerischa, regionala und lokala Produkt sorgend miar für gnussvolli Moment!
Dr Berggnuss Foodtrailer staht i dem Summer au am Heidsee. Da findsch feini Bergflada, Früchtebecher, Frozen Joghurt und Getränk. Mier öffnend öppe am 11i.
